Íslenska eðlið

Ég gat ekki á mér setið. Íslendingar geta verið svo fyrirsjáanlegir stundum að það er ekki fyndið.

Time er búið að tilnefna Davíð Oddsson sem einn af 25 aðilum sem bera ábyrgð á heimsfjármálakreppunni. Þetta er náttúrulega strax komið í öll blöð á Íslandi. 

Maður þarf að fletta í gegnum alla aðilana og getur svo gefið þeim einkunn frá 1-10, (saklaus-sekur). Davíð Oddsson trónir langefstur með næstum 6000 atkvæði (þegar þetta er skrifað) á meðan næsti maður er með ca 4500 atkvæði (og svo 4100, 4000, 3800 osfrv.) Íslendingar bregðast manni sjaldan í netkosningum ;) 

Ég skil alveg að fólk kenni Davíð um ástandið á Íslandi þó mér finnist fólk stara einum of mikið á Davíð, það þarf að fara að hugsa um alla hina sem bera jafnmikla ef ekki meiri ábyrgð á ástandinu. En, að kenna Davíð um heimsskreppuna, æi ég veit það ekki. Kannski ætti maður að bara að vera stoltur að litla Ísland er ekki svo lítið þrátt fyrir allt, fyrst við getum haft svona mikil áhrif á alla heimsbyggðina.